Öz kefinə maşın sürüb motosikletçini özündən çıxardı: “Belə sürürəm, sonra?” - VİDEO

Paytaxtın Binəqədi rayonu, Hüseynqulu Sarabski küçəsində qayda pozan sürücü görüntülənib.

Avtosfer.az-ın məlumatına görə, hadisə bir neçə gün əvvəl günorta saatlarında qeydə alınıb.

Kadrlardan göründüyü kimi, 90-YX-393 dövlət nömrə nişanlı “Hyundai” markalı avtomobilin sürücüsü dar yolda yol şəraitinə uyğun olmayan şəkildə olduqca aşağı sürətlə hərəkət edib. Nəticədə arxadan gələn motosikletçinin hərəkətinə maneə yaranıb və onun hərəkəti ləngiyib.

Motosikletçi yolboyu bir neçə dəfə siqnal verərək sürücüyə xəbərdarlıq etsə də, sürücü ona məhəl qoymayıb və eyni sürətlə hərəkətini davam etdirib.

Bundan sonra motosikletçi avtomobilin sol tərəfinə keçərək sürücüyə “O necə maşın sürməkdir?” deyə irad bildirib. Sürücü isə “Belə sürürəm, sonra? Adam kimi sür” ifadəsi ilə öz hərəkətinə haqq qazandırıb.

Qeyd edək ki, qanunvericiliyə əsasən, sürücü yol şəraitini, avtomobilin və yükün xüsusiyyətlərini nəzərə alaraq nəqliyyat vasitəsini müəyyən edilmiş sürət həddini aşmadan, hərəkətin təhlükəsizliyini təmin edən sürətlə idarə etməlidir. Eyni zamanda, əsassız olaraq aşağı sürətlə hərəkət etməklə digər nəqliyyat vasitələrinin hərəkətinə maneə yaratmaq da yol hərəkəti iştirakçılarının təhlükəsizliyinə mənfi təsir göstərə bilər.

Nərmin