Qaranlıq yolda ard-arda təhlükə: Biri önünə çıxdı, digəri maşını yolda saxladı - VİDEO

Tərtər rayonu, Qaradağlı kəndində qeydə alınan təhlükəli anlar kameraya düşüb.

Avtosfer.az-ın məlumatına görə, hadisə avqustun 16-da saat 20:54 radələrində qeydə alınıb.

Belə ki, əks istiqamətdə hərəkət edən avtomobil ötmə əməliyyatı zamanı qarşı zolağa çıxaraq qəfil 77-EG-591 dövlət qeydiyyat nişanlı “DAF” markalı yük maşınının qarşısına keçib. “DAF”ın sürücüsü səs siqnalı verərək ona xəbərdarlıq edib. Xoşbəxtlikdən avtomobilin sürücüsü vaxtında öz zolağına qayıdıb.

Lakin təhlükə bununla da bitməyib. Yük maşınının sürücüsü yolun hərəkət hissəsində dayanmış “VAZ-2104” markalı avtomobili gördükdən sonra toqquşmanın qarşısını almaq üçün əks istiqamətli yola keçməli olub.

Qeyd edək ki, ötmə manevri zamanı sürücü qarşıdan gələn nəqliyyat vasitələri üçün təhlükə yaratmayacağına əmin olmalıdır. Ötmə yalnız manevrin təhlükəsiz şəkildə həyata keçirilə biləcəyi halda edilməlidir.

Nəqliyyat vasitəsi nasazlıq səbəbindən yolun hərəkət hissəsində dayanmalı olduqda isə mümkün qədər yolun kənarına çəkilməli, digər hərəkət iştirakçıları üçün təhlükə yaratmamalı və qəza dayanma nişanı ilə xəbərdarlıq edilməlidir.

Hadisənin gecə saatlarında baş verməsi və yolun işıqlandırılmaması isə təhlükəli vəziyyəti daha da artırıb. Belə yollarda həm dayanmış nəqliyyat vasitələrinin vaxtında görünməsi, həm də sürücülərin qarşıdakı maneələri əvvəlcədən müəyyən edə bilməsi üçün yolun işıqlandırılması mühüm əhəmiyyət daşıyır.

Nərmin