Qaydaları hələ də mənimsəməyən sürücü yolayrıcında qəza şəraiti yaratdı - VİDEO

Paytaxtın Nəsimi rayonunda yol hərəkəti qaydalarını pozan sürücü avtomobilin kamerasına düşüb.

Avtosfer.az-ın məlumatına görə, hadisə sentyabrın 2-də saat 17:33 radələrində Puşkin və Nizami küçələrinin kəsişməsində baş verib.

Kadrlardan göründüyü kimi, 90-ZX-099 dövlət qeydiyyat nişanlı “Lynk&Co” markalı avtomobilin sürücüsü zolaqda yerləşmə qaydasını pozub. Belə ki, yalnız düzünə hərəkətə icazə verilən zolaqda dayanan sürücü yolayrıcına daxil olduqdan sonra qəfil sola manevr edib.

Nəticədə o, sol zolaqda hərəkətdə olan nəqliyyat vasitəsinin qarşısına çıxaraq qəza şəraiti yaradıb. Təhlükə ilə üzləşən digər sürücü vaxtında dayanaraq qəzanın qarşısını alıb.

Qeyd edək ki, sürücü manevr etməzdən əvvəl hərəkət istiqamətinə uyğun zolaqda düzgün mövqe tutmalıdır.

Nərmin