Qəfil manevr edən sürücü təhlükə yaradıb azyaşlı sərnişini qorxuya saldı - VİDEO

Ələt–Astara yolunun Lənkəran rayonundan keçən hissəsində qayda pozan sürücü kameraya düşüb. 

İzləyicilərdən biri Avtosfer.az-ın “Instagram” hesabına hadisə videosunu göndərərək məlumat verib.

Olay martın 24-də saat 18:34 radələrində qeydə alınıb.

Kadrlardan görünür ki, EO-503326 dövlət nömrə nişanlı “Krone SDR27” yük maşını hərəkətdə olduğu zolaqdakı avtomobilləri ötmək üçün qəfil sola manevr edib. Nəticədə o, sol zolaqda hərəkət edən avtomobilin qarşısına keçərək qəza şəraiti yaradıb. Xoşbəxtlikdən təhlükəylə üzləşən sürücü ehtiyatlı davranaraq qəzanın qarşısını alıb. Şikayətçinin sözlərinə görə, hadisə zamanı avtomobildə olan azyaşlı övladı ciddi qorxu keçirmişdi.

Xatırladaq ki, yola diqqət yetirmədən qəfil manevr edən sürücü həm özünü, həm də digər yol istifadəçilərini riskə atır və bu hal inzibati məsuliyyət doğurur. Ən pis halda isə ağır qəzalara gətirib çıxarır.

Nərmin