Qəza zamanı avtomobili yerindən tərpətmək olar, yoxsa yox? – Ekspert AÇIQLADI - VİDEO

Nəqliyyat eksperti Eldəniz Cəfərov yol-nəqliyyat hadisələri zamanı sürücülərin davranışını tənzimləyən qanunvericilikdə ziddiyyətli məqamların olduğunu bildirib. Avtosfer.az xəbər verir ki, onun sözlərinə görə, bu ziddiyyətlər qəza iştirakçılarının qərar verməsini çətinləşdirir və sonradan əlavə problemlərə səbəb ola bilər.

Eldəniz Cəfərov bildirib ki, "Yol hərəkəti haqqında" Qanunun 37-ci maddəsinə əsasən, yol-nəqliyyat hadisəsi baş verdikdə sürücü avtomobilin yerini dəyişməməlidir. Lakin həmin maddənin növbəti hissəsində göstərilir ki, hadisə nəticəsində xəsarət alan olmayıbsa, nəqliyyat vasitələrinə ciddi ziyan dəyməyibsə və sürücülər arasında razılıq varsa, müəyyən şərtlər daxilində avtomobili yolun hərəkət hissəsindən kənara çəkmək mümkündür.

Ekspertin fikrincə, bu iki müddəa arasında ziddiyyət var və praktikada sürücülər üçün ciddi çətinlik yaradır.

Qəza anında sürücünün avtomobilə dəyən zərərin "ciddi" olub-olmadığını dəqiq qiymətləndirməsi mümkün deyil. Həmçinin ilk baxışda xəsarətsiz görünən sərnişin və ya sürücüdə sonradan sağlamlıq problemi aşkarlana bilər. Belə hallarda isə sığorta ödənişləri və hüquqi məsuliyyətlə bağlı mübahisələr yarana bilər.

Eldəniz Cəfərov hesab edir ki, bu qeyri-müəyyənliyin aradan qaldırılması üçün "Yol hərəkəti haqqında" Qanunun 37-ci maddəsinə yenidən baxılmalı, bir-birinə zidd olan müddəalar sadələşdirilməli və sürücülər üçün aydın, birmənalı qaydalar müəyyən edilməlidir.

Qanunvericilikdəki bu boşluqlar aradan qaldırılarsa, həm qəza yerində qərarvermə prosesi asanlaşar, həm də sonradan yaranan hüquqi və sığorta mübahisələrinin sayı azalar.

Eltac Zülfüqaroğlu