Sükan arxasında hansı hallarda telefondan istifadə etmək olar – QANUN NƏ DEYİR?

Sürücülərin sükan arxasında mobil telefondan istifadə etməsi yol hərəkəti təhlükəsizliyi baxımından aktual məsələlərdən biridir. 

Avtosfer.az xəbər verir ki, sükan arxasında mobil telefondan istifadə sürücünün diqqətini yayındıraraq yol-nəqliyyat hadisəsi riskini artıra bilər. 
Bəs sürücülər avtomobil idarə edərkən telefondan hansı hallarda istifadə edə bilərlər və səsgücləndirici və ya “Bluetooth” vasitəsilə danışmaq qanunla mümkündürmü? 

Mövzu ilə bağlı nəqliyyat eksperti Yasin Mustafayev Avtosfer.az-a açıqlamasında bildirib ki, sürücü avtomobil idarə edərkən mobil telefonu əldə tutaraq istifadə edə bilməz:

''Telefon xüsusi tutacaqda yerləşdirildikdə isə ondan istifadə etmək və danışmaq mümkündür. Bununla belə, avtomobil idarə edərkən sürücünün diqqətini yayındıran digər elektron avadanlıqlardan istifadə də təhlükəlidir. 
Qanunvericilikdə yalnız mobil telefon deyil, sürücünün diqqətini yayındıra biləcək digər elektron avadanlıqların da əldə tutularaq istifadəsinə dair məhdudiyyətlərin nəzərdə tutulması məqsədəuyğun olardı. Çünki GPS cihazı, fotoaparat və digər elektron vasitələr də sürücünün diqqətini yayındıra bilər. Buna görə də avtomobil idarə edərkən bu cür avadanlıqlardan istifadə məsələsinə daha geniş yanaşılmalıdır''.

Fatimə