Sürücü prospektdə bərkitmədən daşıdığı yüklə təhlükə yaratdı - VİDEO

Paytaxtın Nəsimi rayonunda təhlükəli vəziyyət qeydə alınıb. 

Avtosfer.az xəbər verir ki, 10-NJ-841 dövlət nömrə nişanlı "KamAZ" markalı yük avtomobili heç bir təhlükəsizlik tədbiri görmədən yol hərəkətinə çıxıb. Maşının arxa hissəsinə qaydalara zidd şəkildə daşınan kubik daşlar yüklənib ki, bu da yolda həm sürücünün özünə, həm də digər hərəkət iştirakçılarına ciddi təhlükə yaradıb.

Sürücünün bu cür qayda pozuntusu oktyabrın 17-si 22:30 radələrində Ziya Bünyadov prospektindəki tuneldə müşahidə edilib.

Belə hallarda arxadan gələn avtomobillər üçün qəza riski xeyli artır. Mütəxəssislər bildirirlər ki, bu cür məsuliyyətsiz daşınma qaydaları “Yol hərəkəti haqqında” Qanunun tələblərinə ziddir və inzibati məsuliyyət yaradır.

Ekspertlər sürücülərə xəbərdarlıq edirlər ki, yüklərin daşınması zamanı təhlükəsizlik tədbirlərinin görülməsi, yəni yükün bərkidilməsi, örtülməsi və normaya uyğun daşınması təkcə qayda deyil, həm də həyatların qorunması baxımından vacib şərtdir.

Qeyd edək ki, bu kimi halların qarşısının alınması üçün Daxili İşlər Nazirliyinin Baş Dövlət Yol Polisi İdarəsi sürücüləri bir daha diqqətli olmağa çağırır və belə qayda pozuntularına qarşı ciddi nəzarətin davam etdirildiyini bildirir.

Eltac Zülfüqaroğlu