Sürücü qayda pozub təhlükə yaratdı, sərnişin isə orta barmaq göstərdi - VİDEO

Bakı Şəhər Dövlət Yol Polisi İdarəsindən Avtosfer.az-ın sorğusuna cavab olaraq bildirilib ki, sözügedən sürücü barəsində qanunamüvafiq tədbir görülüb.

*** 18:00

Paytaxtın Sabunçu rayonu, Böyükşor-Pirşağı şosesində qayda pozan sürücü avtomobilin kamerasına düşüb.

Avtosfer.az-ın məlumatına görə, hadisə avqustun 11-də səhər saatlarında qeydə alınıb. Görüntülərdən məlum olur ki, 88-BG-505 dövlət qeydiyyat nişanlı “Changan” markalı avtomobilin sürücüsü qarşısında hərəkət edən nəqliyyat vasitəsini ötmək məqsədilə sağ zolağa manevr edir. Lakin həmin zolaqda yük avtomobilinin olması və videonu qeydə alan sürücünün də hərəkətini davam etdirməsi səbəbindən bu cəhd baş tutmur.

Bundan sonra “Changan”ın sürücüsü aqressiv davranış nümayiş etdirərək əvvəlcə avtomobilin işıqlarını yandırıb-söndürməklə narazılığını ifadə edir. Bir qədər sonra isə videonu qeydə alan avtomobilin qarşısına keçərək qəfil tormoz verir və bununla da digər hərəkət iştirakçısı üçün təhlükəli vəziyyət yaradır.

Hadisə bununla yekunlaşmır. Daha sonra həmin avtomobilin ön sərnişin oturacağında əyləşən şəxs əlini pəncərədən çıxararaq videonu qeydə alan sürücüyə qarşı nalayiq jest nümayiş etdirir.

Qeyd edək ki, yol hərəkətində qəsdən aqressiv davranış nümayiş etdirmək, digər sürücülərin hərəkətinə təhlükə yaradan manevrlər etmək və qəfil əyləcləmə ilə qəza riski yaratmaq qanunvericiliyin tələblərinə ziddir. Sürücülər mübahisəli vəziyyətlərdə emosiyalara qapılmaq əvəzinə təhlükəsizliyi prioritet tutmalı və yaranmış halların hüquqi qaydada araşdırılmasına üstünlük verməlidirlər.

Nərmin