Sürücülər tərsinə quraşdırılmış nişana görə məsuliyyətə cəlb edilir - FOTO

Bakıda yol nişanının düzgün quraşdırılmaması sürücülərin narazılığına səbəb olub. Sürücülərdən biri məsələ ilə bağlı sosial şəbəkə hesabında paylaşım edib.

Avtosfer.az xəbər verir ki, hadisə Binəqədi rayonu ərazisində, 182 saylı məktəbə gedən yolda qeydə alınıb. Belə ki, ikitərəfli yolun sağ tərəfində dayanma-durmanı qadağan edən yol nişanı hərəkət istiqamətinə əks şəkildə quraşdırılıb.

Sürücülərin sözlərinə görə, nişanın arxa hissəsi onlara tərəf olduğundan qadağanedici nişanı görmək mümkün deyil. Nəticədə yolun sağ tərəfində avtomobil saxlayan sürücülər kamera vasitəsilə cərimələnirlər. Onlar tətbiq olunan cərimələrin haqsız olduğunu bildirirlər.

"Yol hərəkəti haqqında" Qanunda qeyd olunur ki, yol nişanı elə quraşdırılmalıdır ki, sürücü onu aydın görə və tələblərini vaxtında başa düşə bilsin.

Düzgün quraşdırılmayan nişana görə sürücülərin məsuliyyətə cəlb edilməsi doğru hesab edilmir.

Fərid