“Usta çağırıram” bəhanəsi ilə avtomobili həyətin girişində saxladı - FOTO

Paytaxtın Nəsimi rayonu, Şamil Əzizbəyov küçəsində dayanma və durma qaydalarını pozan sürücü görüntülənib.

Avtosfer.az-ın məlumatına görə, hadisə avqustun 1-də saat 17:00 radələrində qeydə alınıb.

Fotolardan görünür ki, 99-DE-223 dövlət qeydiyyat nişanlı “Mercedes” markalı avtomobil yaşayış kompleksinin giriş hissəsində saxlanılıb və əraziyə giriş-çıxışa maneə yaradıb.

Hadisə şahidlərinin sözlərinə görə, sürücü avtomobilin nasaz olduğunu, usta çağıracağını bildirərək nəqliyyat vasitəsini həmin yerdə qoyub. Lakin sonradan onun yaxınlıqdakı dönərxanaya daxil olduğu iddia edilir.

Qeyd edək ki, yaşayış binalarının giriş-çıxışını məhdudlaşdıracaq şəkildə nəqliyyat vasitəsinin saxlanılması digər hərəkət iştirakçıları və sakinlər üçün çətinlik yaradır. Belə hallarda sürücülər yalnız avtomobilin həqiqətən texniki nasazlığı yarandıqda qəza işıq siqnallarını yandırmalı, müvafiq xəbərdaredici nişanı quraşdırmalı və maneəni mümkün qədər qısa müddətdə aradan qaldırmalıdırlar. Əks halda, yol hərəkəti qaydalarının tələblərinin pozulmasına görə inzibati məsuliyyət yarana bilər.

Nərmin