Velosipedçinin yolunu kəsib: “Avtobus zolağı ilə get” dedi - FOTO

Paytaxtın Xətai rayonu, Afiyəddin Cəlilov küçəsində dayanma-durma qaydalarını pozan sürücü ilə bağlı görüntülənib.

Bu barədə izləyicilərdən biri Avtosfer.az-ın “İnstagram” ünvanına fotoşəkil göndərərək məlumat verib. Fotodan aydın görünür ki, 77-JR-993 dövlət nömrə nişanlı “Fiat Ducato” markalı yük maşını velosiped zolağında park edilib. 

Nəticədə həmin ərazidən keçən velosiped və skuter sürücülərinin hərəkəti çətinləşib və onlar avtomobillərin intensiv hərəkət etdiyi zolağa çıxmaq məcburiyyətində qalıblar.

Şikayətçinin sözlərinə görə, o, sürücüyə qayda pozuntusu ilə bağlı irad bildirdikdə qarşı tərəf buna “Avtobus zolağı ilə gedə bilirsən də, niyə uzadırsan?” cavabını verib.

Bildirilib ki, həmin yük avtomobili demək olar ki, hər gün eyni ərazidə velosiped zolağında saxlanılır və bu hal ərazidən istifadə edənlərin narazılığına səbəb olur.

Qeyd edək ki, velosiped zolağında dayanma və ya durma digər hərəkət iştirakçılarının təhlükəsizliyini ciddi şəkildə risk altına salır. Belə hallarda velosiped və skuter sürücüləri zolağı tərk edərək avtomobillərin hərəkət etdiyi hissəyə çıxmağa məcbur qalır ki, bu da yol-nəqliyyat hadisəsi riskini əhəmiyyətli dərəcədə artırır. Buna görə də, sürücülər xüsusi hərəkət zolaqlarını zəbt etməməli və digər hərəkət iştirakçılarının təhlükəsiz hərəkətinə maneə yaratmamalıdırlar.

Nərmin