Zabratda təhlükəli ötmə edən sürücü yolu kəsib qəza riski yaratdı - VİDEO

Paytaxtın Sabunçu rayonu, Zabrat qəsəbəsində qayda pozan sürücü avtomobilin kamerasına düşüb.

Avtosfer.az-ın məlumatına görə, hadisə oktyabrın 27-də saat 21:27 radələrində Nəsibə Zeynalova küçəsində qeydə alınıb. Videodan göründüyü kimi, “Mercedes” markalı avtomobil önündəki yük maşınını ötmək üçün əks istiqamətli yola çıxıb. Bu zaman o, qarşıdan gələn nəqliyyat vasitəsinə təhlükə yaradıb. Xoşbəxtlikdən qəza baş verməyib. 

Qeyd edək ki, əks istiqamətli yola çıxmaq ən riskli manevrlərdən biridir. Xüsusilə iri qabaritli və yük avtomobillərini ötərkən qarşıdakı yolu tam görmək mümkün olmur, çünki bu cür nəqliyyat vasitələrinin arxasında geniş “kor zona” yaranır. Nəticədə sürücü qarşıdan gələn maşını vaxtında görməyə bilər və bir anlıq səhv faciə ilə bitə bilər. 

Belə vəziyyətdə sürücü ötməyə tələsməməli, əvvəlcə qarşı zolağın tam açıq olduğuna, qarşıdan gələn nəqliyyatın görünmədiyinə və yol nişanlarının icazə verdiyinə əmin olmalıdır. Əgər bu şərait yoxdursa, ötməni təxirə salmaq ən doğru qərardır.

Nərmin