Zağulba yolunda velosiped zolağını parkinqə çevirdilər – ETİRAZ - VİDEO

Zağulba yolunda kütləvi şəkildə dayanma-durma qaydalarını pozan sürücülər qeydə alınıb.

Avtosfer.az-ın məlumatına görə, hadisəni ərazidən keçən velosipedçilərdən biri videoya çəkərək sosial şəbəkədə paylaşıb.

Görüntülərdən məlum olur ki, müxtəlif markalı avtomobillər velosipedçilər üçün ayrılmış hərəkət zolağında park edilib. Bu səbəbdən velosipedçilər zolaqdan istifadə edə bilməyərək məcburi şəkildə avtomobillərin hərəkət etdiyi zolağa çıxıblar ki, bu da onların təhlükəsizliyini ciddi risk altına qoyub.

Videoda velosipedçilərdən biri yaranmış vəziyyətə etiraz edərək bildirib: “Mən indi digər zolaqla hərəkət etdiyimə görə cərimələnsəm, bu avtomobillərin sürücüləri mənim cəriməmi ödəyəcəklər?”.

Qeyd edək ki, qanunvericiliyə əsasən, velosiped zolağında nəqliyyat vasitələrinin saxlanılması və ya park edilməsi qadağandır. Belə hallar velosipedçiləri onlar üçün nəzərdə tutulmuş təhlükəsiz hərəkət sahəsini tərk etməyə məcbur edir və avtomobillərlə eyni zolaqda hərəkət etmələrinə səbəb olur. Bu isə yol-nəqliyyat hadisəsi riskini əhəmiyyətli dərəcədə artırır.

Nərmin