Zolağa yerləşməyən sürücü tuneldə də təhlükə saçmağa davam etdi - VİDEO

Paytaxtın Binəqədi rayonunda kobud qayda pozan sürücü avtomobilin kamerasına düşüb.

Avtosfer.az-ın məlumatına görə, hadisə avqustun 2-də saat 17:22 radələrində qeydə alınıb. Görüntülərdən məlum olur ki, 99-NB-040 dövlət qeydiyyat nişanlı “Toyota” markalı avtomobilin sürücüsü hərəkət zamanı ardıcıl şəkildə manevr qaydalarını pozub.

Belə ki, sürücü zolaqlar arasında tez-tez yerini dəyişərək digər hərəkət iştirakçıları üçün qəza şəraiti yaradır. Daha sonra iki zolağın ortasıyla gedərək hadisəni qeydə alan avtomobili sıxışdırır. Sürücü “Şamaxinka” nın tunelinə daxil olduqdan sonra da qayda pozmağa davam edir. O, bütöv xəttin tələbini pozaraq dəfələrlə zolaq dəyişir.

Qeyd edək ki, qanunvericiliyə əsasən, sürücülər manevr etməzdən əvvəl digər hərəkət iştirakçıları üçün təhlükə yaratmayacaqlarına əmin olmalı, yol nişanlarının və nişanlanma xətlərinin tələblərinə əməl etməlidirlər. Eyni zamanda tuneldə və ya yolun məhdud görünüşlü hissələrində ötmə manevrlərinin edilməsi qadağandır. 

Nərmin