Hacıqabulda AĞIR QƏZA: ÖLƏN VAR - YENİLƏNİB

Hacıqabulda baş verən yol-nəqliyyat hadisəsi nəticəsində xəsarət alan şəxslərin vəziyyəti açıqlanıb.

Avtosfer.az xəbər verir ki, bu barədə Oxu.Az-a Tibbi Ərazi Bölmələrini İdarəetmə Birliyindən (TƏBİB) məlumat verilib.

Bildirilib ki, hadisə nəticəsində xəsarət alan üç nəfər (iki kişi, bir qadın) bu gün saat 00:10-da Şirvan Şəhər Mərkəzi Xəstəxanasının Təcili tibbi yardım şöbəsinə hospitalizasiya olunub:

"Müxtəlif növ bədən xəsarətləri alan pasiyentlərə zəruri tibbi xidmətlər göstərilib. Hazırda müvafiq şöbələrdə müalicələri davam etdirilir, vəziyyətləri orta ağır qiymətləndirilir".
 

***09:39

Hacıqabulda ağır yol-nəqliyyat hadisəsi baş verib.

Avtosfer.az APA-ya istinadən xəbər verir ki, hadisə Bakı-Qazax magistralının Hacıqabul rayonunun Atbulaq kəndi ərazisindən keçən hissəsində qeydə alınıb.

Belə ki, "KamAZ" markalı yük avtomobili ilə "Mercedes Vito" markalı mikroavtobus toqquşub.

Hadisə nəticəsində bir nəfər ölüb, Türkmənistan vətəndaşları - 1958-ci il təvəllüdlü Elbrus Tağıyev və 1957-ci il təvəllüdlü Nailya Tağıyeva xəsarətlərlə Şirvan Rayon Xəstəxanasına yerləşdiriliblər.

Faktla bağlı araşdırma aparılır.