Hövsanda motosiklet “Mercedes”ə çırpıldı, sürücü bir neçə metr kənara düşdü - REAL VİDEO

Paytaxtın Suraxanı rayonu, Hövsan qəsəbəsində baş verən yol-nəqliyyat hadisəsi anbaan kameraya düşüb.

Avtosfer.az-ın məlumatına görə, qəza sentyabrın 30-da saat 01:30 radələrində qeydə alınıb.

Belə ki, motosiklet sürücüsü işıqforun qırmızı işığında yolayrıcına daxil olub və bu zaman sağ tərəfdən gələn “Mercedes” markalı avtomobillə toqquşub. Zərbənin təsirindən motosikletçi bir neçə metr kənara düşüb.

Hadisədən dərhal sonra ayağa qalxan sürücü axsayaraq səkiyə çıxıb. Xoşbəxtlikdən, həmin vaxt ərazidən keçən təcili tibbi yardım briqadası dayanaraq ayağından xəsarət alan motosikletçiyə ilkin yardım göstərib.

Kadrlardan motosiklet sürücüsünün qoruyucu dəbilqədən istifadə etmədiyi də aydın görünür.

Xatırladaq ki, qanunvericiliyə əsasən, sürücülər svetoforun qadağanedici siqnalında hərəkəti davam etdirməməlidirlər.

Nərmin