Bakıdakı bu küçəni su basdı; qurum hərəkətə keçdi - VİDEO

Paytaxtın Hövsan qəsəbəsi 118 nömrəli məktəbin qarşısında yağışdan sonra suların yığılıb qalması sakinlər üçün böyük problemə çevrilib. 

Avtosfer.az xəbər verir ki, sosial şəbəkələrdə yayılan videoda vətəndaşın yolu keçməkdə çətinlik çəkməsi açıq şəkildə görünür. Yağış sularının yollarda uzun müddət qalması nəticəsində ərazidə böyük bir göl əmələ gəlib, sakinlərin normal hərəkət etməsi mümkünsüz hala düşüb. İnsanlar məcbur qalıb su dolu iri gölməçələrin kənarından keçməyə çalışır, bəzi hallarda suyun içindən addımlamaqdan başqa çıxış yolu qalmır. Bundan əlavə, yığılan suyun uzun müddət çəkilməməsi ərazidə antisanitar şərait formalaşdırır. Sakinlər aidiyyəti qurumların məsələyə müdaxilə etməsini, küçədə suyun yığılmasının qarşısını almaq üçün yağış-kanalizasiya sisteminin təcili olaraq yenilənməsini tələb edirlər. 

Məsələ ilə bağlı Avtosfer.az-a İri Şəhərlərin Birləşmiş Su Təchizatı Agentliyindən bildirilib ki, həmin yolun kənarında yağış sularının axıdılması üçün hazırda mövcud olan drenaj xətti illər öncə başqa bir qurum tərəfindən çəkilib və axıdılan yağış suları şambo tipli quyuya axır. Rayon Sukanal idarəsinin xidmət sferasına aid olmayan həmin xəttin diametri tələbatdan kiçikdir, bu baxımdan ərazinin yağış sularından tam təmizlənməsi əlavə vaxt alır. Hazırda küçə sulardan xeyli dərəcədə təmizlənib.
Nurcan Babək