Bu yerlərdə taksi sifariş etmək nəqliyyatın hərəkətinə mane olur? – AÇIQLAMA - VİDEO

Hazırda Bakıda dayandığımız istənilən nöqtədən taksi sifariş verə bilirik. Təbii ki, bu, sərnişinlər üçün nəqliyyatın əlçatanlığı deməkdir. Amma bu vəziyyət nəqliyyatın hərəkətində ləngimələr də yaradır.

Çox vaxt dayanma-durma qadağan olunan ərazilərdə də mobil tətbiqlə taksi sifariş edirik. Bu isə nəqliyyatın rahat hərəkətinə mane olur və onsuz da səhərdən axşama qədər tıxac olan şəhərdə sıxlığı bir az da artırır.

Avtosfer.az-ın məlumatına görə, nəqliyyat məsələləri üzrə ekspert İlqar Hüseynli deyir ki, bir çox ölkələrdə sərnişinlərin taksini dayanma-durma qadağan olunan ərazilərdə sifariş verməsi qadağandır. Ekspertin sözlərinə görə, bu qayda bizdə də tətbiq oluna bilər. Ya da avtobus dayanacaqlarına taksilərin də girişinə icazə verilməlidir.

Ekspert bildirir ki, digər bir çıxış yolu isə taksi duracaqlarının yaradılmasıdır.

Qeyd edək ki, bir neçə il əvvəl Bakı şəhərində onlarla taksi duracağı var idi. Lakin Bakı Nəqliyyat Agentliyi o zaman həmin duracaqlarını ləğv etdi. Ötən 7-8 ildə isə yeni taksi duracaqlarının yaradılacağı barədə anonslar verilsə də, heç bir nəticə olmadı.