Moped idarə etmək üçün sürücülük vəsiqəsi tələb olunacaq

Azərbaycanda moped sürən şəxslər üçün yeni tələblər müəyyənləşdirilir.

Milli Məclisin bu gün keçirilən iclasında “Yol hərəkəti haqqında” qanuna dəyişikliklər müzakirə olunub və sənəd III oxunuşda qəbul edilib.

Avtosfer.az xəbər verir ki, dəyişikliklərin əsas məqsədi mopedlərin istismarı ilə bağlı qaydaları daha da dəqiqləşdirmək, bu nəqliyyat vasitələrini idarə edən şəxslərin bilik və bacarıqlarını artırmaq və ümumilikdə yol hərəkəti təhlükəsizliyini gücləndirməkdir.

Qanun layihəsində ən vacib yeniliklərdən biri moped idarə etmək üçün sürücülük vəsiqəsinin alınmasının məcburi tələb edilməsidir. Bu addım moped sürücülərinin müəyyən hazırlıq səviyyəsinə malik olmalarını təmin edəcək və yol təhlükəsizliyinə müsbət təsir göstərəcək.

Sənədə əsasən, moped nəqliyyat vasitəsinin anlayışı daha dəqiq təsbit edilir, mopedlərin dövlət qeydiyyatına alınaraq uçota götürülməsi nəzərdə tutulur. Eyni zamanda, mopedlər üçün əvvəl tətbiq edilən yalnız yolun sağ kənarı ilə hərəkət etmə tələbi ləğv olunur.

Qanun layihəsində həmçinin motosiklet və mopedlərin uzunluq və eni üzrə qabaritlərindən 0,5 metrdən artıq çıxan və ya idarəetməyə mane ola biləcək yüklərin daşınması qadağan edilir.

Yeni tənzimləmələrin yaxın vaxtlarda qüvvəyə minəcəyi gözlənilir.