Sürücülük hüququnun müddəti neçə il olmalıdır? - Avropda və Azərbaycanda fərqli YANAŞMA

Avropada əhalinin sürətlə yaşlanması sürücülük hüququnun müddəti ilə bağlı məsələnin aktuallaşmasına səbəb olub. 

Avtosfer.az xəbər verir ki, Avropa İttifaqı ölkələrində sürücülük hüququ ilə bağlı yaş senzi müəyyən edilməyib. Lakin bütün ölkələrdə yaşlı sürücülər üçün tibbi müayinə məcburidir.

Məsələn, İspaniyada 65, Danimarkada 70, İtaliya və Niderlandda isə 75 yaşdan sonra sürücülər hər 5 ildə 1 dəfə həkim müayinəsindən keçməklə sürməyə davam edə bilərlər. Lakin komissiyadan keçmək 5 il arxayın sürmək anlamına gəlmir. Bir çox ölkədə vahid məlumat bazası olduğu üçün əhalinin tibbi müayinəsi zamanı əldə edilən nəticələr bazaya yüklənir. Polisin də bu bazaya çıxışı olduğundan məlumatlar periodik yoxlanılır. Məsələn, hesab edək ki, 75 yaşlı sürücü tibbi müayinədən uğurla keçdikdən 1 ay sonra infarkt keçirib, yaxud eşitmə qabiliyyəti zəifləyib. Bu zaman polis sözügedən vətəndaşın sürücülük vəsiqəsini əlavə tibbi komissiya olmadan ləğv edir. 

İndi isə Avropa Komissiyası vahid sistem yaratmaq istəyir: yəni, yaşlı sürücülər üçün müayinələri intensivləşdirmək və bütün ölkələrdə eyni yaş senzinin qoyulması tələb edilir.

Komissiya ekspertlərinin Aİ-yə üzv ölkələrdə apardığı araşdırma maraqlı faktı aşkara çıxarıb. Məlum olub ki, yaşlı sürücülər cavanlara nisbətən daha az qəza törədirlər. Bunun da səbəbi onların sürət limitinə daha ciddi əməl etməsi, yola çıxarkən spirtli içki qəbul etməməsi gecə vaxtı və ya əlverişsiz havada yola az çıxmalarıdır. Bundan başqa, yaşlı sürücülər uzaq yola çıxdıqda saatlarla sükan arxasında oturmur, daha tez-tez fasilə verirlər. Sonuncu amil sürücünün diqqətini toplamasına imkan verir.

Maraqlı budur ki, Avropada yaşlı sürücülərin əməl etdikləri qaydaları Azərbaycanda yol polisi demək olar hər ay xatırladır. Başqa sözlə, DYP-nin tövsiyələri ilə avropalı qocaların davranışı üst-üstə düşür. Nəticədə ağır qəzaların sayı azalır.

Vüqar