DYP əlverişsiz hava şəraitində gücləndirilmiş rejimdə xidmət aparır - VİDEO

Ölkəmizin bəzi ərazilərində müşahidə olunan əlverişsiz hava və mürəkkəb yol şəraitinə baxmayaraq, Baş Dövlət Yol Polisi İdarəsinin əməkdaşları hərəkət iştirakçılarının təhlükəsizliyini təmin etmək məqsədilə gücləndirilmiş iş rejimində fasiləsiz xidmət aparır.

Avtosfer.az xəbər verir ki, qarlı və şaxtalı hava şəraitinin hökm sürdüyü bölgələrdə yol-nəqliyyat hadisələrinin qarşısının alınması, nəqliyyat axınının tənzimlənməsi və hərəkətin təhlükəsiz təşkili istiqamətində zəruri tədbirlər görülür. Xüsusilə enişli-yoxuşlu ərazilərdə, körpülərdə və intensiv hərəkətin müşahidə olunduğu magistral yollarda nəzarət daha da artırılıb.

DYP əməkdaşları tərəfindən sürücülərlə maarifləndirici söhbətlər aparılır, onlara hava və yol şəraitinə uyğun sürət həddinin seçilməsi, ara məsafəsinin qorunması və nəqliyyat vasitələrinin texniki sazlığının təmin edilməsi ilə bağlı tövsiyələr verilir. Eyni zamanda, yollarda yaranan çətinliklərlə bağlı daxil olan müraciətlərə operativ reaksiya göstərilir.

Görülən tədbirlər əlverişsiz hava şəraitinin yaratdığı risklərin minimuma endirilməsinə və hərəkət iştirakçılarının təhlükəsizliyinin təmin olunmasına yönəlib. Gücləndirilmiş iş rejimi mövcud hava şəraiti sabitləşənədək davam etdiriləcək.