Nömrələri pozan sürücüləri hansı cəza gözləyir? - DYP-dən CAVAB

Bəzi sürücülər daha gözəl göründüyünü düşünərək avtomobil nömrələrinin üzərinə həkk olunmuş defis simvollarını silirlər. Bu barədə sosial şəbəkələrdə bəzi görüntülər də yayılıb.

Bəs avtomobil qeydiyyat nişanına müdaxilə edənləri hansı cəza gözləyir?

Məsələ ilə bağlı Bakı Şəhər Dövlət Yol Polisi İdarəsinə sorğu ünvanladıq.

Bakı Şəhər Dövlət Yol Polisi İdarəsinin bölmə rəisi Toğrul Nəsirli bildirib ki, bəzi sürücülər qeyd edilən formada dövlət qeydiyyat nişanına müdaxilə etməsi qayda pozuntusudur.

T.Nəsirlinin sözlərinə görə, bu addım öz növbəsində inzibati məsuliyyət yaradır:

“Belə hal aşkarlandığı təqdirdə sürücü barəsində Azərbaycan Respublikasının İnzibati Xətalar Məcəlləsinin 342.1.3-cü maddəsinə əsasən mövcud standartlara uyğun olmayan dövlət qeydiyyat nişanları ilə nəqliyyat vasitəsinin idarə edilməsinə görə 40 (qırx) manat məbləğində cərimə də nəzərdə tutulub”.(sfera.az)