Məşhur avtomobil şirkətləri alıcılarını aldatdı, təzminat davası açıldı - FOTO

Avropada dizel avtomobillərinin emissiyaları ilə bağlı daha bir qalmaqal baş verib. 

Avtosfer.az xəbər verir ki, Hollandiyada aparılan sinif davası çərçivəsində “Opel”, “Peugeot”, “Citroen” və “DS” markalı avtomobillərdə emissiya testlərini aldatmaq məqsədilə proqram təminatının dəyişdirildiyi müəyyən olunub.

Hollandiya məhkəməsinin qərarına əsasən, 2009-cu ildən etibarən bu markaların satdığı milyonlarla dizel mühərrikli avtomobildə dələduzluq halları aşkarlanıb. Məhkəmə 2014-cü ildən sonra istehsal edilən “Peugeot”, “Citroen” və “DS” modellərində, habelə 2009-cu ildən etibarən istifadə edilən “Opel” avtomobillərində azot oksidi (NOx) emissiyalarını süni şəkildə aşağı göstərən proqram təminatının quraşdırıldığını təsdiqləyib.

Qərarda bildirilir ki, bu proqram təminatı yalnız rəsmi laboratoriya testləri zamanı aktivləşərək normadan aşağı nəticələr göstərir. Real sürücülük şəraitində isə həmin avtomobillərin emissiya dəyərləri olduqca yüksəkdir. Bu isə Avropa Birliyinin emissiya tələblərinin texniki cəhətdən pozulması deməkdir.

Məhkəmə əlavə edib ki, digər markalara məxsus dizel avtomobillərdə də oxşar proqram təminatının istifadəsi ilə bağlı “güclü şübhələr” mövcuddur.

Sözügedən markalar – “Opel”, “Peugeot”, “Citroen” və “DS” hazırda Stellantis avtomobil konserninə daxildir. Stellantis məhkəmənin qərarından narazı qalaraq apellyasiya şikayəti verib və bildirib ki, bütün avtomobillər mövcud ekoloji normalara tam cavab verir. Şirkət, həmçinin müvəqqəti qərarda “bir sıra qüsurlu qiymətləndirmələrin” olduğunu iddia edib.

Hələlik kompensasiya ilə bağlı qərar verilməyib. Təsirə məruz qalan avtomobil sahiblərinə təzminat ödənilib-ödənilməyəcəyi gələcək məhkəmə proseslərində müəyyən ediləcək.

Eltac Zülfüqaroğlu