"Nissan" dünyada 20 min iş yerini bağlayır

Yaponiyanın üçüncü ən böyük avtomobil istehsalçısı olan Nissan Motor, qlobal miqyasda 20 minə yaxın iş yerini ixtisar etməyə hazırlaşır.

Avtosfer.az xəbər verir ki, bu şirkətin ümumi işçi qüvvəsinin təxminən 15%-ni təşkil edir. NHK telekanalının məlumatına görə, bu qərar zəif satışlar və bazar payının azalması fonunda verilib.

Nissan, xüsusilə ABŞ və Çin kimi əsas bazarlarda satış çətinlikləri ilə üzləşib. Şirkət ənənəvi və hibrid modellər bazarındakı dəyişikliklərə adaptasiya ola bilməyib, həmçinin elektrikli avtomobillər sahəsində erkən üstünlüyünü qoruyub saxlaya bilməyib.

Yeni təyin olunmuş baş direktor İvan Espinosa rəhbərliyində şirkət ciddi struktur islahatları aparır. O bildirib ki, əlavə tədbirlər də gündəmdədir. Nissan 2023-cü ilin noyabrında artıq 9,000 iş yerini ixtisar edəcəyini açıqlamışdı. Bununla yanaşı, Tailandda yerləşən zavodun bu ilin iyununda bağlanması, eləcə də iki başqa zavodun da fəaliyyətinə son verilməsi planlaşdırılır.

Şirkət Yaponiyanın Kyuşu adasında 1.1 milyard dollarlıq EV batareya zavodu tikmək planından da imtina edib, baxmayaraq ki, bu layihə üçün dövlət subsidiyaları da nəzərdə tutulmuşdu.

2025-ci ilin martında başa çatan maliyyə ili üçün Nissan 700-750 milyard yen (təxminən 5 milyard ABŞ dolları) rekord xalis zərər gözlədiyini bildirib. Bu itki əsasən aktivlərin dəyərinin silinməsi ilə əlaqəlidir. Şirkət, həmçinin, ilin dörd rübündə də mənfəət proqnozlarını aşağı salmağa məcbur olub.

Yeni strategiya çərçivəsində, Nissan Çin bazarında təxminən 10 yeni model təqdim etməyi planlaşdırır ki, bu da satışların bərpasına yönəlmiş mühüm addım hesab olunur.(fed.az)