Rusiyada cavabı bəlli sual: Niyə yaponlara çata bilmirik?

Rusiya hökuməti avtomobil sənayesinin 2035-ci ilədək inkişaf strategiyasını təsdiq edib.

Avtosfer.az xəbər verir ki, strategiyanın başlıca məqsədi illik avtomobil istehsalını 2,8 milyon ədədə çatdırmaqdır. Müqayisə üçün deyək ki, federasiyada 2025-ci ildə 830 min minik və avtomobili, avtobus və trolleybus istehsal edilib. Sənədə görə həmçinin, 2035-ci ilədək hibrid və elektromobillərin istehsalına keçid də reallaşmalıdır. 

Sənəd ictimailəşdikdən sonra sosial şəbəkənin rus seqmentində ciddi müzakirələrə səbəb olub. Bir çox rus sözügedən strategiyanı 2030-cu ilədək 1000 təyyarə istehsalı planı ilə müqayisə edib (2 il əvvəl qəbul edilmiş planda say 800-ə endirilib, lakin heç 60 təyyarə hazırlanmayıb). 

Başqa bir qrup isə maraqlı sual ortaya qoyub: Yaponiya hökuməti belə planlar qəbul etməsə də, təkcə “Toyota” ötən il 11,2 milyon avtomobil istehsal edib, 11,3 milyon satış həyata keçirib. Bundan başqa, “Nissan”, “Subaru” və “Suzuki” ayrı-ayrılıqda Rusiyadan daha çox maşın istehsal edir. Niyə görə ərazi və resurs cəhətdən dəfələrlə kiçik olan Yaponiyaya çata bilmirik? 

Bizcə, cavab aydındır, əlavə sözə lüzum yoxdur.

Vüqar