Avropanın ən “yaşıl” şəhərləri - FOTO

Avropa şəhərləri əsasən yaşıllığın çoxluğu ilə seçilsə də, yaşıllıqlar şəhərlər üzrə bərabər bölünməyib. Bəzi şəhərlərdə yaşıllıqlar cəmi 10 faiz yer tutursa, digərində 70 faizi ötür.

Avtosfer.az xəbər verir ki, “Statista” İnstitutu ən çox yaşıllığı olan 10 Avropa şəhərinin statistikasını açıqlayıb. 

Beləliklə, onluğun sonuncu pilləsində qərarlaşan Parisin 26 faizi təbii yaşıllıqla örtülüb. Bulon meşəsi, Lüksemburq bağı hamıya tanışdır. 
Niderlandın paytaxtı Amsterdamın 31 faizi təbii meşə və çəmənlikdir. Kanalların bolluğu yaşıllıqların artmasına təbii şərait yaradır.
Qədim abidələri ilə seçilən Romanın 34 faizini yaşıllıqlar tutur.

Avropanın siyasi mərkəzlərindən olan Brüsselin 42 faizi təbii meşə və çəmənliklə örtülüdür. 1829-cu ildə açılmış Botanika bağı bu gün də sevilir.
Berlində isə bir qədər mərkəzdən uzaq məhəllələrdə qarşınıza çaqqal və ya qaban çıxa bilər. Almaniya paytaxtının 51 faizini yaşıl məkanlar tutur. Bu ərazilərdə velosiped çığırları geniş yayılıb.

Vaxtilə öküz döyüşləri (korida) ilə məşhur olan Madridin 53 faizi parklarla örtülüdür. Krallıq Nəbatat bağı patyaxtın ən gözəl yaşıl məkanlarındandır.

Dördüncü yerdə gələn İsveçrənin paytaxtı Berndə də yaşıllıqların həcmi Madridlə eynidir – 53 faiz.

Helsinki şəhəri 213 kvadrat kilometr meşə və parkla Avropada üçüncüdür.  Hələlik 62 faizi yaşıllıqla örtülü olan şəhərdə parkların həcmi ilbəil artır. 

Xorvatiyanın paytaxtı Zaqrebin 74 faizi yaşıl ərazidir. Bitki örtüyünə görə şəhər Avropada ikincidir. Şəhərin ən qədim ictimai parkı olan Maksimir 1787-ci ildə salınıb.

Birinci yeri isə elektromobil sayına görə Avropa lideri olan Oslo tutur. 77 faizlik göstərici ilə Norveç paytaxtı Avropada ən “yaşıl” kapital hesab edilir.

Vüqar Yaşaroğlu