Gəncədə döngəyə sərt girən sürücü qəza törətdi - ANBAAN VİDEO

Gəncə şəhəri, Səməd Vurğun küçəsində baş vermiş yol-nəqliyyat hadisəsi avtomobilin kamerasına düşüb.

Avtosfer.az-ın məlumatına görə, hadisə bir müddət əvvəl axşam saatlarında qeydə alınıb. Belə ki, “Chevrolet Cruze” markalı avtomobil “KIA” markalı maşınla toqquşub.
Kadrdan göründüyü kimi, “Chevrolet”in sürücüsü döngəyə yüksək sürətlə və sərt daxil olur, nəticədə qarşı istiqamətdən gələn avtomobilə çırpılır. Zərbənin təsirindən “KIA” bordürə dəyərək istiqamətini dəyişib. Qəza nəticəsində hər iki nəqliyyat vasitəsinə maddi ziyan dəyib, xəsarət alan olmayıb.

Qeyd edək ki, döngələrə yüksək sürətlə daxil olmaq ən təhlükəli manevrlərdən biridir. Belə hallarda avtomobilin idarəetmədən çıxması və qarşıdan gələn nəqliyyat vasitəsi ilə toqquşma riski artır. Sürücülər bu cür halların qarşısını almaq üçün döngələrə daxil olarkən sürəti azaltmalı və yol şəraitinə uyğun hərəkət etməlidirlər.

Nərmin