Prospektdə ardıcıl təhlükə yaradan sürücü təhqir də etdi - VİDEO

Paytaxtın Moskva prospektində yol hərəkəti qaydalarını kobud şəkildə pozan sürücü kameraya düşüb.

Hadisə ilə bağlı görüntülər Avtosfer.az-ın “WhatsApp” nömrəsinə izləyicilərdən biri tərəfindən göndərilib. Hadisə mayın 20-də gecə saatlarında qeydə alınıb.

Şikayətçinin bildirdiyinə əsasən, 90-NB-750 dövlət qeydiyyat nişanlı “Hyundai” markalı avtomobilin sürücüsü ən sol zolaqda hərəkət etməsinə baxmayaraq icazə verilən sürətdən aşağı templə nəqliyyat vasitəsini idarə edib. Bu səbəbdən digər sürücü dəfələrlə ona xəbərdarlıq edərək zolağın boşaldılmasını işarə edib.

Bir müddət sonra “Hyundai” sürücüsü sağ zolağa manevr etsə də, dərhal yenidən sol zolağa qayıdaraq görüntünü qeydə alan avtomobil üçün qəza şəraiti yaradıb. Kadrlarda sürücünün əlini avtomobilin pəncərəsindən çıxararaq təhqiredici ifadələr işlətdiyi də iddia olunur.

Bundan əlavə, o, tunelə daxil olarkən bütöv xəttin tələbini pozaraq qayda pozuntusunu davam etdirib və növbəti dəfə təhlükəli vəziyyət yaradıb.

Nərmin