Şəhərin mərkəzində geri manevr edən “Prius” “BYD” ilə toqquşdu - VİDEO

Sürücülərin geri manevr zamanı diqqətsizliyi yol-nəqliyyat hadisələrinə səbəb ola bilər. Yol Hərəkəti haqqında qanunun 42-ci maddəsinin 13-cü hissəsinə əsasən, geri hərəkət sürücülər üçün xüsusi diqqət tələb edən manevrdir. Maddənin tələbinə görə, geri manevr etməzdən əvvəl sürücü arxada və yanlarda piyadalar, velosipedçilər və digər nəqliyyat vasitələrinin olmadığından əmin olmalıdır. Hərəkətin əvvəlcədən siqnal verilməklə digər sürücülərə və piyadalara xəbərdar edilməsi vacibdir. Eyni zamanda geri hərəkət zamanı sürət minimuma endirilməli, tələsik və ani manevrlərdən çəkinilməlidir. Maneəsiz və təhlükəsiz ərazilərdə geri manevr həyata keçirilməlidir. Dar küçələrdə və sıx nəqliyyat zonalarında daha ehtiyatlı olmaq tələb olunur. Maddəyə uyğun olaraq, əgər sürücünün öz görmə qabiliyyəti ilə təhlükəsiz manevr etmək mümkün deyilsə, zərurət yarandıqda digər şəxslərin köməyindən istifadə etmək olar.

Paytaxtın Səbail rayonu, Rəsul Rza küçəsində baş vermiş yol qəzası işıqlandırdığımız məsələni əyani şəkildə göstərir.

Avtosfer.az xəbər verir ki, hadisə bir neçə gün əvvəl axşam saatlarında qeydə alınıb. “Toyota Prius” markalı maşın, “BYD” markalı avtomobillə toqquşub. Videodan görünür ki, “Toyota” sürücüsü geriyə manevr etdiyi zaman arxada dayanmış maşına diqqət yetirməyib və qəza qaçılmaz olub. Hadisədən sonra sürücülər arasında kiçik mübahisə yaşanıb.

Qanunun tələblərinə əməl etməyən sürücülər həm öz təhlükəsizliyini, həm də başqalarının həyatını riskə atır. Geri manevr zamanı diqqətli olmaq və qaydalara riayət etmək yol-nəqliyyat hadisələrinin qarşısını almaq üçün vacibdir.

Nərmin