“Sürücülərə 5 fərqli starter təklif edirlər” – Avtoekspert saxta ehtiyat hissələrindən danışdı - VİDEO

Avtomobil sahəsində tez-tez qarşılaşılan əsas problemlərdən biri ehtiyat hissələrinin uyğunsuzluğu və bu sahədə vahid kataloqun olmamasıdır. Bəzi hallarda eyni model avtomobil üçün bir neçə fərqli ehtiyat hissəsinin göstərilməsi ustalar və sürücülər üçün çaşqınlıq yaradır.

Avtosfer.az xəbər verir ki, mövzu ilə bağlı avtomobil eksperti Şahin Göyləroğlu bu məsələyə münasibət bildirib.

Ekspertin sözlərinə görə, eyni avtomobil üçün bir neçə fərqli starterin göstərilməsi və orijinal kodla gələn hissələrin uyğun gəlməməsi bu sahədəki sistemsizliyin nəticəsidir: “Bir avtomobil üçün bəzən beş fərqli starter göstərilir. Orijinal kodla gələn hissə belə uyğun gəlmir. Əgər bir avtomobilin xidmətində ardıcıl kataloq yoxdursa, bu çox müşkül məsələdir və nəticədə sürücülər üçün ciddi çətinlik yaradır”, – deyə Şahin Göyləroğlu bildirib.

O əlavə edib ki, avtomobil üçün düzgün ehtiyat hissələri bazası və kataloq yaratmaq son dərəcə mürəkkəb prosesdir: “Avtomobil üçün kataloq hazırlamaq və məlumat bazası qurmaq elə də asan deyil. Bunu təkcə fərdlər deyil, bəzi dövlətlər belə tam şəkildə bacarmır. Məsələn, Çin kimi güclü avtomobil sənayesinə malik bir ölkə belə bu sistemi sabit şəkildə formalaşdıra bilməyib.”

Ekspert, həmçinin, vurğulayıb ki, Rusiyada bu proses Azərbaycana nisbətən daha sürətlə inkişaf edir: “Rusiyanın illik avtomobil ehtiyat hissələri idxalı Azərbaycanın bəlkə də 15 illik idxalına bərabərdir. Buna görə də orada sistem bizdən 15-20 dəfə daha sürətli formalaşır.”

Şahin Göyləroğlu sonda qeyd edib ki, sürücülər və ustalar bu məsələdə daha səbirli və diqqətli olmalıdırlar: “Bəzən insanlar elə bilirlər ki, avtomobili idarə etdikləri üçün hər şeyi bilirlər, amma bu belə deyil. Ehtiyat hissəsi satanlar və ustalar da hər zaman hər şeyi bilmir. Buna görə diqqətli olmaq lazımdır”.

Eltac Zülfüqaroğlu