ABŞ-nin avtomobil şirkətləri istehsalın bir hissəsini Çinə köçürə bilər

ABŞ-nin ən böyük avtomobil istehsalçıları və onların təchizatçıları bəzi ehtiyat hissələrinin istehsalını Çinə köçürmək imkanını nəzərdən keçirirlər. Buna səbəb Çinin nadir torpaq metallarının ixracını dayandırması olub.

Avtosfer.az-ın xəbərinə görə, bu barədə "The Wall Street Journal" (WSJ) mənbələrə istinadən məlumat verib.

Məlumata görə, ABŞ avtomobil istehsalçıları ehtiyat edirlər ki, bir neçə həftədən sonra nadir torpaq metalları çatışmazlığı səbəbindən bir sıra avtomobillərin istehsalını dayandırmalı ola bilərlər. İxrac nəzarətindən yan keçmək üçün onlar elektrik mühərrikləri istehsalına Çin fabriklərində başlaya və ya nadir torpaq elementlərinin ərintilərindən hazırlanmış maqnitlərin quraşdırılması üçün ABŞ-də istehsal olunan mühərrikləri Çinə tədarük edə bilərlər.

Qeyd olunur ki, məhdudiyyətlər hazır hissələrə deyil, təkcə maqnitlərə şamil edilir.