Almaniya avtomobillərini alanlar azalır - SƏBƏB

Almaniyanın avtomobil sənayesində geriləmə davam edir.

Avtosfer.az xəbər verir ki bu, bu gün dərc olunan “Ernst & Young” (EY) konsaltinq şirkətinin araşdırmasında əksini tapıb.

Məlumatlar göstərir ki, Almaniya istehsalçıları gəlirlərin azalması, mənfəətin kəskin düşməsi və “rentabelliyin sürətlə azalması” ilə üzləşirlər. Xüsusilə “Volkswagen”, BMW və “Mercedes” hələ də sənaye üçün mühüm əhəmiyyət daşıyan Çin bazarında mövqelərini sürətlə itirməkdə davam edir.

EY-nin məlumatına görə, 2026-cı ilin ilk yarısında Almaniyanın avtomobil konsernlərinin gəlirləri 2,9 faiz azalaraq təxminən 284 milyard avroya düşüb. Eyni zamanda, dünyanın 19 ən iri avtomobil konserninin ümumi gəliri 3,6 faiz artaraq təxminən 1,048 trilyon avroya çatıb.

Yapon konsernləri gəlirlərini 7,9 faiz, digər Avropa istehsalçıları 9,8 faiz, ABŞ konsernləri 4,5 faiz, Çin şirkətləri isə 0,9 faiz artırıb. Ölkələr üzrə müqayisədə Almaniya istehsalçıları sonuncu yerdə qərarlaşıb.

Aparıcı Almaniya avtomobil konsernlərinin rentabelliyi 5 faizdən aşağı düşüb

Araşdırmanın məlumatına görə, ilin ilk altı ayında “Volkswagen”, BMW və “Mercedes” şirkətlərinin orta rentabelliyi 5,5 faizdən 4,6 faizə düşüb. Sənaye üzrə 10 illik orta göstərici 5,9 faiz təşkil edir. Ancaq bir neçə il əvvəl isə Almaniya konsernləri ikirəqəmli rentabelliyə nail olurdular.

Almaniyanın üç aparıcı avtomobil şirkəti birlikdə 13 milyard avrodan bir qədər çox mənfəət əldə edib. Bu, 2017-ci ildən bəri ikinci ən aşağı göstəricidir. Yalnız 2020-ci ildə - COVID-19 pandemiyasının ilk ilində - ilin ilk yarısında mənfəət daha aşağı olub.

Ekspert: Geriləmənin səbəbi rentabellik böhranıdır

“Alman avtomobil sənayesi rentabellik böhranı yaşayır”, - deyə AFP EY eksperti Konstantin Qallın (Constantin Gall) sözlərini sitat gətirib. O bildirib ki, “Almaniya istehsalçıları təkcə bazar paylarını deyil, hər şeydən əvvəl gəlirliliklərini itirirlər”.

Onun qiymətləndirməsinə görə, bunun səbəbləri təkcə yüksək əməkhaqları deyil, həmçinin enerji daşıyıcılarının qiymətləri və Almaniyadakı bürokratik xərclərdir. O vurğulayıb ki, ölkədə istehsal getdikcə daha az sərfəli olur: “Buna görə də Almaniya konsernləri daha cəlbedici regionlara köçməklə vəziyyətdən çıxış yolu axtarırlar”.

ABŞ-ın tətbiq etdiyi gömrük rüsumları ilə yanaşı, Almaniyanın avtomobil sənayesi üçün digər problem Çində bazarın inkişaf xüsusiyyətləridir. Qallın sözlərinə görə, “bazar son dərəcə yüksək rəqabətlə xarakterizə olunur, zəif iqtisadi şərait fonunda bahalı premium avtomobillər yaxşı satılmır, böyüməkdə olan elektromobil seqmentində isə çinli alıcılar yerli brendlərə üstünlük verirlər”.

Çin bazarı Almaniya şirkətləri üçün böyük əhəmiyyət daşıyır. Bu bazar olmadan digər regionlarda gəlirlərin itirilməsini qısa müddətdə kompensasiya etmək son dərəcə çətin olacaq. Ötən il “Volkswagen”, “Mercedes” və BMW-nin qlobal satışlarında Çinin payı 28,9 faizdən 23,5 faizə düşüb.