Avropada 8 avtomobil zavodu bağlana bilər

Avropa İttifaqında avtomobil istehsalçıları azalan tələbat və "BYD" kimi Çin markaları ilə rəqabət səbəbindən səkkiz zavodu bağlaya bilərlər.

Avtosfer.az xəbər verir ki, bu barədə "Bloomberg" agentliyi məlumat yayıb.

Bildirilir ki, hazırda Avropada avtomobil zavodlarının orta güc yükü cəmi 55% təşkil edir, 75%-dən az yüklənmiş zavodlar zərərlə işləyir.

Ən pis nəticə göstərən şirkət "Stellantis"-dir. Ekspertlər Çin brendlərinin bu il Avropa bazarının təxminən 5%-ni tutacağını və 2030-cu ilə qədər bu rəqəmin 10%-ə çatacağını proqnozlaşdırırlar.

"Yaxın illərdə Avropa avtomobil istehsalçıları Çin markalarına satışda milyonlar uduzacaqlar", – deyə "AlixPartners" konsaltinq şirkətinin icraçı direktoru Fabian Piontek bildirib.

"AlixPartners" hesab edir ki, 10 000 işçisi olan böyük zavodun bağlanması 1,5 milyard avroya başa gəlir.