Çin avtomobilləri rekordlar qırır - Satışlar ikiqat artdı

2026-cı ilin mart ayında Çin avtomobil istehsalçıları Avropada rekord satış göstəricisinə çataraq 149 094 avtomobil satıblar.  Avtosfer.az Qaynarinfo-ya istinadən xəbər verir ki, bu barədə "Automotive News" məlumat yayıb. Qeyd olunan rəqəm ötən ilin eyni dövrü ilə müqayisədə 97% artım deməkdir. Çin brendlərinin Avropa bazarındakı payı isə 9,4%-ə yüksəlib. Əvvəlki rekord 111 334 avtomobil səviyyəsində 2025-ci ilin dekabrında qeydə alınmışdı. Bu, Çin avtomobillərinin Avropada 100 min satış həddini keçdiyi nadir aylardan biridir. Mart ayında artımı əsasən plug-in hibridlərə olan yüksək tələb təmin edib. Bu seqmentdə satışlar dörd dəfə artıb və Avropada satılan hər üç Çin avtomobilindən biri (32%) hibriddir.

Avropada ən populyar Çin avtomobil markaları:

* MG – 39 717 ədəd (+2,6%)

* BYD – 37 732 ədəd (+152%)

* Chery – 36 551 ədəd (+369%)

Eyni zamanda Avropa Avtomobil İstehsalçıları Assosiasiyasının (ACEA) məlumatına görə, 2026-cı ilin martında Avropa İttifaqında yeni minik avtomobillərinin satışları illik müqayisədə 12,5% artaraq 1 158 317 ədədə çatıb.

Avropada mühərrik növlərinə görə ən çox satılan yeni avtomobillər:

* Hibridlər (HEV) – 444 835 ədəd (+20%)

* Benzinli avtomobillər – 262 617 ədəd (-9%)

* Elektrik avtomobilləri (BEV) – 234 532 ədəd (+49%)

* Plug-in hibridlər – 105 414 ədəd (+28%)

* Dizel avtomobillər – 83 739 ədəd (-12%)

* Digər növlər – 27 180 ədəd (-20%)

Ümumilikdə 2026-cı ilin ilk rübündə Avropa İttifaqında 2 822 616 yeni avtomobil qeydiyyata alınıb ki, bu da ötən illə müqayisədə 4% artım deməkdir.