Çinli istehsalçıların qlobal problemi: maşın çox, bazarlar kiçikdir

Çinin avtomobil sənayesinin sürətli inkişafı problemlər də doğurub. 

Avtosfer.az Avropa mənbələrinə istinadla xəbər verir ki, istehsalçılar ciddi bazar problemi ilə üzləşiblər. 2025-ci ildə ölkədə 30 milyon avtomobil istehsal olunub ki, bu da 2024-cü illə müqayisədə 10 faiz çoxdur. 

Ötən il istehsal edilmiş avtomobillərin 23 milyondan bir qədər çoxu satılıb. 7 milyona yaxın maşın müştəri gözləyir. Daxili bazar dolduğu üçün böyük istehsalçılar ixraca yönəlirlər.

Çin avtomobil istehsalçıları Assosiasiyasının statistikasına görə ötən il ixracın lideri 1,3 milyon avtomobillə “Chery” olub. Növbəti yerləri 1 milyonluq ixracla BYD, 900 min maşınla SAİC və 600 minlə “Geely” bölüşür. Bu dörd istehjsalçı avtomobil ixracının üçdə ikisini reallaşdırıb. 

Çinli istehsalçıların ilk hədəfi 450 milyon nəfərin yaşadığı Avropadır. Ötən il qitədə təzə Çin maşınlarının bazar payı 6 faizə çatıb. Gələn il isə bu payın 10 faiz olacağı gözlənilir.

Digər ölkələrdə satışlar artsa belə, artıq istehsal problemini aradan qaldırmaq mümkün olmayıb. Dünyanın əksər ölkələrində Çin avtomobillərinin bolluğu yaranıb. Zavodlar isə tam gücü ilə işləyir.

Vüqar Yaşaroğlu