Təkər boltlarını pnevmatik alətlə açıb bağlamaq ziyanlı imiş - DİQQƏT!

Sürücülər yəqin bu halla rastlaşıblar: avtomobilin təkərini açanda boltdan pis səs çıxır, bolt yuvaları paslanıb, ya da təkər barabana yapışıb. Bəs səbəb nədir?

Avtosfer. az xəbər verir ki, bu nasazlıqların kökündə səhv texniki qulluq dayanır. Bir çox sürücü və ustada belə bir yanlış fikir hakimdir ki, təkər boltlarını yağlamaq olmaz, çünki yüksək sürətdə açılacaq. Bu cür düşünənlər “nə üçün yüksək təzyiq altında yağlanan dirsəkli valın boltları açılmır?” sualı qarşısında aciz qalırlar.

Təkər boltları paslandıqda bolt yuvasını zədələyir. Bunun qarşısını almağın sadə üsulu boltları yağlayaraq yerinə bağlamaqdır. Növbəti dəfə açdıqda bolt asanlıqla açılacaq. O ki qaldı boltların yüksək sürətdə açılmasına, bu, tamamilə başqa texniki nasazlıq (əsasən vibrasiya) səbəbindən ortaya çıxır.

Təkər boltlarının pnevmatik alətlə açılıb-bağlanması da zərərlidir. Buna görə də, sürücülər montaj zamanı təkərin ənənəvi açarla bağlanmasını tələb edə bilərlər. Bəzən sürücülər özləri təkər dəyişdikdə boltları sıxmaq üçün ya açarın üstünə çıxır, ya da əlavə borudan istifadə etməklə boltları daha bərk sıxırlar. Nəzərə almaq lazımdır ki, avtomobil təmiri üçün lazım olan açarlar insanın qol qüvvəsinə əsaslanır. Açarın üstünə çıxmaq, yaxud, əlavə güc üçün boru salmaz yalnız yivli birləşmələrə zərər verir.

Vüqar Yaşaroğlu