Avtomobilin önünə qəfil çıxan azyaşlı velosipedçi qorxulu anlar yaşatdı - VİDEO

Paytaxtın Gəncə prospektində baş verən təhlükəli anlar avtomobilin videoregistratoruna düşüb.

Avtosfer.az-ın məlumatına görə, hadisə iyulun 20-də saat 20:15 radələrində qeydə alınıb. Görüntülərdən məlum olur ki, ara küçədən velosipedlə əsas yola çıxan azyaşlı hərəkətdə olan nəqliyyat vasitələrinə məhəl qoymadan, əks istiqamətdə hərəkət edib. Bu zaman o, videonu qeydə alan avtomobilin qarşısına qəfil çıxıb. Sürücü operativ reaksiya göstərərək əyləcə basıb və ehtiyatlı davranışı sayəsində mümkün faciənin qarşısını son anda alıb.

Qeyd edək ki, azyaşlıların nəzarətsiz şəkildə intensiv hərəkətin olduğu yollara buraxılması onların həyat və sağlamlığı üçün ciddi təhlükə yaradır. Valideynlər uşaqların yol hərəkəti qaydalarını mənimsəməsinə xüsusi diqqət yetirməli, onların xüsusilə magistral və hərəkətin sıx olduğu küçə və prospektlərdə nəzarətsiz hərəkət etməsinə yol verməməlidirlər. Belə hallarda bir anlıq diqqətsizlik ağır yol-nəqliyyat hadisəsi ilə nəticələnə bilər.

Nərmin