Bakıda daha bir kafedə nöqsanlar AŞKARLANDI - FOTO

Bakı şəhəri, Nəsimi rayonu, H.Aslanov küçəsi, ev 85, mənzil 20 ünvanında fiziki şəxs İbrahim Ağaisa oğlu Nəbiyevə məxsus “İbrahim Kabab Evi” ictimai iaşə obyektində Azərbaycan Qida Təhlükəsizliyi Agentliyi tərəfindən keçirilmiş yoxlama zamanı normativ-hüquqi aktların tələblərinin pozulduğu məlum olub. Agentliyin İnformasiya təminatı və innovativ həllər şöbəsindən Avtosfer.az-a verilən məlumata görə, yoxlama zamanı iaşə obyektində istehlaka təqdim edilən ətlərin baytarlıq müşayiətedici sənədlərinin olmadığı aşkarlanıb. Ət və ət məhsullarından, alət və avadanlıqlardan götürülmüş nümunələrin laborator müayinəsi nəticəsində uyğunsuzluqlar müəyyən edilib. Faktla bağlı nöqsanlar aradan qaldırılanadək ictimai iaşə obyektində işlərin görülməsi, xidmətlərin göstərilməsi məhdudlaşdırılıb, rəhbərliyi barəsində inzibati protokol tərtib olunub.