Bakıda yeni dələduzluq üsulu - Qarajda qızıl alıb saxta dollar verdi

Bakıda dələduzluq hadisəsi qeydə alınıb.

Avtosfer.az xəbər verir ki, hadisə paytaxtda fəaliyyət göstərən qızıl satışı ilə məşğul olan mağazalardan birində baş verib.

Belə ki, 8 200 manat dəyərində qızıl sifarişi verilib və məhsulun ünvana kuryer vasitəsilə çatdırılması istənilib.

Məlumata görə, kuryer sifarişi Grand Həyat yaşayış kompleksinin qarajında təhvil verməli olub. Özünü müştəri kimi təqdim edən şəxs ödənişi dollarla edəcəyini bildirərək kuryeri aldadıb və ona ümumilikdə 4 900 ABŞ dolları məbləğində saxta pul təqdim edib.

Pulların saxta olduğu anlaşıldıqdan sonra mağaza müştəri ilə əlaqə saxlayıb. Lakin qarşı tərəf pulların saxta olduğunu inkar edərək kuryeri görüş yerinə geri çağırıb. Kuryeri və mağaza sahibini həmin ərazidə gözlədən şəxs, daha sonra onların nömrəsini bloka ataraq telefonu söndürüb.

Qeyd olunub ki, məsələ ilə bağlı hüquq-mühafizə orqanlarına müraciət edilib. Dələduzluq edən şəxsin və ya şəxslərin müəyyən edilməsi istiqamətində araşdırma aparılır.

Mağaza sahibi vətəndaşları diqqətli olmağa və alış-veriş zamanı milli valyuta ilə ödənişə üstünlük verməyə çağırıblar./demokrat.az