Binəqədidə illərdir təmir olunmayan yol sakinləri bezdirib - FOTO - VİDEO

"Son aylarda güclü leysan yağışları səbəbindən asfalt örtüyünün bir hissəsi yararsız vəziyyətə düşmüşdü".

Avtosfer.az xəbər verir ki, bu məlumat Oxu.Az-a Binəqədi Rayon İcra Hakimiyyətindən verilib.

"Bu barədə Azərbaycan Avtomobil Yolları Dövlət Agentliyinin (AAYDA) çağrı mərkəzinə vətəndaşlar tərəfindən məlumat ötürülüb. Asfalt örtükləri ilə bağlı məsələlər aidiyyəti üzrə Azərbaycan Avtomobil Yolları Dövlət Agentliyinin səlahiyyətindədir və məsələnin həlli qurum tərəfindən mərhələli qaydada həyata keçirilir", - deyə məlumatda bildirilir.

***

Bakının Binəqədi rayonunda uzun illərdir təmir olunmayan yol sakinlərin narazılığına səbəb olub.

Avtosfer.az xəbər verir ki, bu barədə Oxu.Az-ın qaynar xəttinə şikayət daxil olub.

Bildirilib ki, söhbət Mirzə Məmmədxan küçəsi, 84 ünvanındakı ərazidən gedir.

"Küçənin bir hissəsi uzun illərdir təmirsiz vəziyyətdədir. Küçənin villalar olan istiqamətində yol təmir edilsə də, heç bir villanın qapısına düşməyən hissəsi baxımsız vəziyyətdə qalıb. Həmin ərazidən avtomobillə keçmək çətinlik yaradır. Üstəlik, orta məktəbin yanı olduğu üçün uşaqların yağışlı havalarda o yolu keçməsi mümkünsüz olur. Çünki ərazidə toplanan su həftələrlə çəkilmir. Ümumilikdə küçənin digər bir neçə hissəsində də belə təhlükəli çökəkliklər var. Bu vəziyyət, xüsusilə günün qaranlıq saatlarında hərəkət iştirakçıları üçün ciddi təhlükə yaradır", - deyə şikayətdə bildirilib.

Problemlə bağlı Binəqədi Rayon İcra Hakimiyyətinə sorğu ünvanlanıb.