Bir nişan yoxdur, digəri görünmür – Bu küçədə hərəkət təhlükəlidir - VİDEO

Paytaxtın Binəqədi rayonu, Süleyman Sani Axundov küçəsində düzgün quraşdırılmayan yol nişanları sürücülər üçün çaşqınlıq yaradır və qəza riskini artırır. 

Sürücülük təlimçisi Arzu Babazadə xoşagəlməz mənzərəni videoya çəkərək Avtosfer.az-ın “WhatsApp” ünvanına göndərib.

Kadrlardan görünür ki, ərazidə yolun istiqamətini göstərən əlavə məlumatverici lövhə quraşdırılıb. Lakin lövhənin birlikdə istifadə olunmalı olduğu əsas yol nişanı yerində yoxdur. Belə ki, bu əlavə lövhə həmin kəsişmədə “Yol ver” və ya “STOP” nişanını tamamlamalı olduğu halda, əsas nişan quraşdırılmayıb. Nəticədə sürücülər kəsişmədə hərəkət üstünlüyünü düzgün qiymətləndirə bilmirlər. Bu isə onların baş yoldakı nəqliyyat vasitələrinə yol vermədən hərəkət etməsinə və nəticədə yol-nəqliyyat hadisələrinin artmasına səbəb ola bilər.

Bundan əlavə, piyada keçidi nişanı da düzgün yerləşdirilməyib. Belə ki, nişan əlavə məlumatverici lövhənin arxasında qaldığından sürücülər tərəfindən vaxtında görünmür. Yolun hərəkət hissəsində piyada keçidi nişanlanması (xətlənmə) mövcud olsa da, xəbərdaredici nişanın görünməməsi bəzi sürücülərdə piyada keçidinin nişanla tənzimlənmədiyi təəssüratı yarada bilər. Bu da piyadalara vaxtında yol verilməməsinə gətirib çıxara bilər.

Qeyd olunan çatışmazlıqların aradan qaldırılması həm sürücülərin, həm də piyadaların təhlükəsizliyi baxımından zəruridir.

Nərmin