Bu ölkənin hava limanına hücum: Pilot HƏLAK OLDU

Səudiyyə Ərəbistanının milli aviadaşıyıcısı “Saudia” şirkətinin kapitanı Ər-Riyaddakı Kral Xalid Beynəlxalq Hava Limanına endirilən zərbə nəticəsində həlak olub.

Avtosfer.az xəbər verir ki, “Əl-Ekhbariya” telekanalı bu barədə aviaşirkətin rəsmi açıqlamasına istinadən məlumat yayıb.

Şirkətin bəyanatında bildirilib ki, hadisə əməkdaşlardan birinin ölümü ilə nəticələnib. Aviaşirkət kapitan Hamud Əl-Kaltaminin ailəsinə və yaxınlarına başsağlığı verib.

“Saudia” həmçinin oktyabrın 8-də baş verən hücum zamanı dayanacaqda olan təyyarələrindən birinin zədələndiyini təsdiqləyib. Həmin vaxt təyyarədə sərnişin olmayıb.

Şirkətin məlumatına görə, hava limanının normal fəaliyyəti oktyabrın 8-də yerli vaxtla saat 18:00-da (Bakı vaxtı ilə 19:00) bərpa edilib.

“Reuters”in məlumatlı mənbələrə istinadən yaydığı məlumata görə, təyyarə ciddi zədələnib və terminalın yaxınlığında mərmi və ya qəlpə zərbəsinə məruz qaldıqdan sonra yanıb.

Qeyd edək ki, oktyabrın 8-də Yəməndə fəaliyyət göstərən “Ənsar Allah” (husilər) hərəkatının hərbi sözçüsü Yəhya Səriya Səudiyyə Ərəbistanının paytaxtındakı hava limanına iki raket zərbəsi endirildiyini açıqlayıb.