Bu yolda hərəkət işgəncəyə çevrilib: Qazılan hissə bir ildir bərpa olunmur - VİDEO

Paytaxtın Xəzər rayonu, Şüvəlan qəsəbəsində yerləşən və “Dəniz yolu” kimi tanınan ərazidə yolun asfalt örtüyü tamamilə yararsız vəziyyətə düşüb.

Avtosfer.az-ın məlumatına görə, bununla bağlı sürücülərdən biri ərazidəki vəziyyəti videoya çəkərək sosial şəbəkələrdə paylaşıb. Kadrlardan görünür ki, yolun asfalt örtüyü ciddi şəkildə aşınıb və bəzi hissələrdə hərəkət üçün əlverişsiz vəziyyət yaranıb. Xüsusilə yolun sol hissəsi demək olar ki, istifadəyə yararsızdır.

Şikayətçinin sözlərinə görə, ərazidə kanalizasiya xətlərinin çəkilməsi məqsədilə qazıntı işləri aparılıb. Lakin işlər başa çatdıqdan sonra yolun asfalt örtüyü əvvəlki vəziyyətinə qaytarılmayıb.

Nəticədə sürücülər sözügedən hissədən çətinliklə hərəkət edir, qarşıdan gələn nəqliyyat vasitələri ilə üz-üzə qaldıqları üçün bir-birilərinə yol vermək məcburiyyətində qalırlar. Bu isə həm nəqliyyatın hərəkətini çətinləşdirir, həm də avtomobillərin zədələnməsi və yol-nəqliyyat hadisəsinin baş verməsi riskini artırır.

Sakinin iddiasına əsasən, artıq bir ildir ki, yol bu vəziyyətdə qalıb və problemin aradan qaldırılması istiqamətində aidiyyəti qurumlar tərəfindən hər hansı tədbir görülməyib. Sürücülər və ərazi sakinləri yolun təmir olunaraq təhlükəsiz hərəkət şəraitinin bərpa edilməsini istəyirlər.

Nərmin