Bura bir uşaq düşsə, faciə olacaqdı... - VİDEO - YENİLƏNİB

Yasamal rayonu ərazisində, əsasən Abdulla Şaiq, Mirzə Ağa Əliyev və Bəşir Səfəroğlu küçələrinin əhatəsində yerləşən Mərkəzi Parkın girişində kanalizasiya quyusunun qapağının çürüməsi nəticəsində təhlükəli oyuq yaranıb.

Avtosfer.az qafqazinfo-ya istinadən xəbər verir ki, sosial şəbəkələrdə yayılan görüntülərdə quyunun içərisində çirkab suları, müxtəlif məişət tullantıları və şüşə qırıqlarının olduğu görünür. Bu isə ərazi ilə hərəkət edən piyadalar, xüsusilə də uşaqlar üçün ciddi təhlükə yaradır.

Videonu paylaşan vətəndaş bildirib ki, park ərazisində bu cür kanalizasiya qapaqları çoxdur və onların əksəriyyəti çürüyərək yararsız vəziyyətə düşüb. 

***

Məsələ ictimailəşəndən sonra parkdakı problemin aradan qaldırıldığı bildirilib. Ərazidən çəkilən fotodan görünür ki, artıq çürümüş dəmir qapaq plastik kvadrat materialla əvəzlənib. 

***

Sözügedən parkdan bildirildi ki lyuk qapağı gecə saatlarında kənar müdaxilə nəticəsində qırılıb. Artıq qapaq yenisi ilə əvəz olunub və problem tam aradan qaldırılıb.​