Buzovnada 10 gündür qaranlığa qərq olan küçə təhlükə saçır - VİDEO

Paytaxtın Xəzər rayonu, Buzovna qəsəbəsi, Albalılıq yaşayış massivində yolun işıqlandırılması ilə bağlı problem yaranıb.

Avtosfer.az-ın məlumatına görə, bu barədə izləyicilərdən biri redaksiyanın “WhatsApp” ünvanına video göndərərək şikayət edib. Görüntülər oktyabrın 9-da axşam saatlarında Ağaəmi Rəhimov küçəsində qeydə alınıb.

Kadrlardan görünür ki, yolda işıq dirəkləri olsa da, onların heç biri işləmir. Nəticədə küçə qaranlığa qərq olub. Bu isə xüsusilə gecə saatlarında hərəkət edən sürücülər üçün çətinlik yaradır. İşıqlandırmanın olmaması səbəbindən sürücülər, xüsusən də tünd rəngli geyimdə olan piyadaları vaxtında görməkdə çətinlik çəkirlər. Bu vəziyyət qəza riskini artırır.

Şikayətçinin sözlərinə görə, küçədə işıqlandırma problemi artıq 10 gündür davam edir, lakin indiyədək hər hansı tədbir görülməyib.

Nərmin