Daha bir dəhşətli EPİDEMİYA - ÖLƏNLƏR VAR

Nigeriyanın Plateau ştatında difteriya epidemiyası nəticəsində 23 nəfər həyatını itirib.

Avtosfer.az xəbər verir ki, ştatın səhiyyə komissarı Nikolas Baamlongun sözlərinə görə, indiyədək 143 difteriya yoluxması qeydə alınıb və onlardan 23-ü ölümlə nəticələnib. O bildirib ki, xəstəliyin yayılması hələ də davam edir.

Baamlong qeyd edib ki, ştat hakimiyyəti infeksiyanın daha geniş yayılmasının qarşısını almaq üçün tədbirləri gücləndirib. Əhali arasında xəstəlik və ondan qorunma yolları barədə maarifləndirmə kampaniyaları da keçirilir.

Bu il Nigeriyada 10 mindən çox təsdiqlənmiş difteriya hadisəsi qeydə alınıb. Son illərdə təkrarlanan epidemiyalarla əlaqədar səhiyyə orqanları ən çox zərər çəkən ərazilərdə vaksinasiya kampaniyaları həyata keçirir.

2022–2025-ci illər ərzində ölkədə 42 mindən çox difteriya hadisəsi qeydə alınıb və xəstəlik nəticəsində təxminən 1 400 nəfər həyatını itirib. Ümumdünya Səhiyyə Təşkilatı Nigeriyada yoluxma hallarının artması fonunda ikinci difteriya epidemiyasının başladığını təsdiqləyib. Xəstəliyin yayılmasının qarşısını almaq məqsədilə UNICEF ötən il Nigeriyaya 9,3 milyon doza vaksin göndərib.

Difteriya “Corynebacterium diphtheriae” bakteriyasının törətdiyi yoluxucu xəstəlikdir. Əsasən boğaz və burunun selikli qişasını zədələyən xəstəlik öskürək və asqırma zamanı yayılan tənəffüs damcıları vasitəsilə insandan insana keçir. Daha az hallarda birbaşa təmas və ya çirklənmiş əşyalar vasitəsilə də yoluxa bilər.

Xəstəliyin əsas təhlükəsi bakteriyanın ifraz etdiyi toksinlə bağlıdır. Bu toksin ciddi fəsadlara və ağır hallarda ölümə səbəb ola bilər.