Diqqətli olun: Azərbaycanla bağlı yayılan bu görüntülər saxtadır – ARAŞDIRMA - VİDEO

Sosial şəbəkələrin Azərbaycan seqmentinə bir sıra xarici ölkələrdən idarə edilən videolar, fotolar və digər paylaşımlar daxil olur. Bu paylaşımlar arasında xüsusilə diqqət çəkən Türkiyə və İrandan idarə edilən səhifələrin yaydığı videodur.

Avtosfer.az-ın araşdırmaları nəticəsində “Azərbaycanda xalq ayağa qalxdı” başlığı altında paylaşılan videonun saxta olduğu müəyyənləşib.

Belə ki, tərkibində İran izinə rast gəlinən səhifələrdə paylaşılan videoda bir qrup insanın etiraz aksiyası keçirməsi, Azərbaycanda xalqın mitinqlər keçirmək üçün küçələrə axışması qeyd olunub.

Lakin araşdırmalar nəticəsində paylaşılan videonun “Neftçi” – “Qarabağ” oyunundan əvvəl klub azarkeşlərinin meydana doğru irəlilədiyi anın görüntüləri olduğu ortaya çıxıb. Qeyd edək ki, həmin oyun 2025-ci il fevralın 16-da Nizami rayonunda yerləşən köhnə adı ilə “Neftçi Arena” stadionunda keçirilib. Yayılan video stadiondan azarkeşlərdən biri tərəfindən çəkilib.

Azərbaycanlılardan belə videolara və bu cür təxribata çağırış məqsədli paylaşımlara aldanmamağı, baş verən hadisələrlə bağlı daha sağlam düşüncəyə sahib şəxslər kimi reaksiyalar verməyi xahiş olunur.

Səfər