Hökməli-Qobu yolundakı çuxurlar daşla nişanlanıb, sürücülər yolun kənarına çıxır - VİDEO

Hökməli–Qobu yolunun Bakı istiqamətində olan hissəsində asfalt örtüyünün yararsız vəziyyətə düşməsi sürücülərin narazılığına səbəb olub.

Avtosfer.az-ın məlumatına görə, ərazidən keçən sürücülərdən biri yolun vəziyyətini əks etdirən görüntüləri sosial şəbəkədə paylaşıb. Kadrlardan görünür ki, yolun hərəkət hissəsində asfalt örtüyü ciddi şəkildə deformasiyaya uğrayıb, dərin çuxurlar əmələ gəlib və həmin çuxurlara kanalizasiya suları dolub.

Bildirilib ki, sürücülər çuxurlardan yayınmaq üçün ya yolun kənarı ilə hərəkət edir, ya da əks istiqamətli yola çıxmaq məcburiyyətində qalırlar ki, bu da yol-nəqliyyat hadisəsi riskini artırır. Görüntülərdə təhlükəli ərazini digər hərəkət iştirakçılarına göstərmək məqsədilə çuxurların yerləşdiyi hissəyə daş qoyulduğu da müşahidə olunur.

Şikayətçinin sözlərinə görə, bu vəziyyət bəzi sürücülərin yolu davam etdirməsinə imkan vermədiyindən onlar geri qayıtmağa məcbur olurlar. İzləyici qeyd edib ki, dərin çuxurlar səbəbindən avtomobillərin alt hissəsi yol səthinə dəyir və nəqliyyat vasitələrinə maddi ziyan dəyir.

Sürücülər problemin qısa müddətdə aradan qaldırılmasını və yolun əsaslı təmir olunmasını istəyirlər.

Nərmin