Hökməli yolunda təhlükəli anlar: Dayça magistral yola çıxdı - VİDEO

Abşeron rayonunun Hökməli qəsəbəsi istiqamətindəki avtomobil yolunda sürücülər üçün çətin və təhlükəli anlar yaşanıb. Buna səbəb qəfil magistral yola çıxan dayça (at balası) olub. Avtosfer.az Oxu.az-a istinadən xəbər verir ki, hadisə ilə bağlı görüntülər sosial şəbəkələrdə yayılıb. Videogörüntülərdən aydın olur ki, nəqliyyatın intensiv hərəkət etdiyi yola qaçan heyvan qəza şəraiti yaradıb. Sürücülər dayçanı vurmamaq üçün sürəti azaldaraq manevrlər etmək məcburiyyətində qalıblar. Hadisə zamanı hər hansı bədbəxt hadisə və ya yol-nəqliyyat qəzası qeydə alınmayıb. Sözügedən görüntülər sosial şəbəkə istifadəçiləri, xüsusilə də sürücülər tərəfindən ciddi müzakirə olunub. Sakinlər magistral yolların yaxınlığında heyvan saxlayan şəxsləri daha diqqətli olmağa və məsuliyyət daşımağa çağırıblar.