İş adamı tiktokerə zərər vurduğunu açıqladı - "Beniz"in məhkəməsi

Tanınmış tiktoker, "Beniz" ləqəbli Aybəniz Xəlilovanın cinayət işi üzrə məhkəmənin növbəti iclası keçirilib. Avtosfer.az-ın Oxu.az-a istinadən məlumatına görə, Bakı Ağır Cinayətlər Məhkəməsinin hakimi Fəxri Məmmədovun sədrliyi ilə keçirilən iclasda vəkilin vəsatəti əsasında Türkiyədə müalicə alan zərərçəkən Xalid Kərimovun videokonfransla prosesə qoşulması təmin edilib.

Zərərçəkən sərbəst ifadəsi zamanı deyib:

"Beniz"lə yaxın münasibətim olub, aramızdakı müəyyən söz-söhbətə görə mənə qarşı ifadə işlətmişdi. Onu qorxutmaq məqsədilə ondan polisə şikayət etdim ki, işlətdiyi ifadəyə görə peşman olsun. Vəkil Nüşabə Ağayevanın vasitəsilə bu iş Suraxanı Rayon Polis İdarəsinə verildi".

Zərərçəkən, həmçinin vurğulayıb ki, Aybəniz Xəlilova ona hər hansı bir zərər vurmayıb, əksinə, özünün təqsirləndirilənə müəyyən zərərlər vurduğunu deyib.

Aybəniz Xəlilovanın vəkili müvəkkilinin ev dustaqlığına buraxılması ilə bağlı yenidən məhkəməyə vəsatət təqdim edib.

Müşavirədən sonra vəsatət təmin edilməyib. Növbəti proses sentyabrın 30-na təyin edilib.

Qeyd edək ki, "Beniz" ləqəbli tiktoker barəsində sevgili olduğu X.Kərimov Suraxanı Rayon Polis İdarəsinə şikayət edib və hüquq-mühafizə orqanı tiktoker barəsində şikayətçinin təqdim etdiyi sübutları əsas götürərək Cinayət Məcəlləsinin 182.2.2 və 182.2.4-cü (hədə-qorxu ilə tələb etmə) maddələri ilə cinayət işi başladıb. Şikayətçi ərizəsində göstərib ki, Aybəniz Xəlilova ondan hissə-hissə olmaqla 836 min manat pul tələb edib. Onun barəsində Suraxanı Rayon Məhkəməsinin qərarı ilə həbs qətimkan tədbiri seçilib.